ქუთაისის მერი იოსებ ხახალეიშვილი და იმერეთში სახელმწიფო რწმუნებული ზვიად შალამბერიძე ისრაელის ელჩს საქართველოში ჰადას ესტერ მეიცადს შეხვდნენ.

ებრაელი დიპლომატი ქუთაისში ორდღიანი სამუშაო ვიზიტით იმყოფება. მან მანამდე შეხვედრები გამართა ქუთაისის საერთაშორისო უნივერსიტეტში, სადაც ისრაელის საინვესტიციო ფონდისა და ქუთაისის უნივერსიტეტის სამომავლო თანამშრომლობაზე ისაუბრა.

როგორც შეხვედრაზე ითქვა,  მიმდინარეობს მუშაობა ისრაელის ქალაქ იოკნეამისა და ქუთაისის დაძმობილების შესახებ. 

„ დღეს ისრაელის ელჩს ჰადას ესტერ მეიცარს შევხვდით. ქალბატონ ელჩთან ვისაუბრეთ იმ მჭიდრო მეგობრობასა და  თანამშრომლობაზე, რაც ქართველ და ებრაელ ხალხს შორის ტრადიციულად არსებობს. ამ ურთიერთობის კიდევ უფრო გასამყარებლად, მიმდინარეობს მუშაობა ქუთაისისა და ისრაელის ქალაქ იოკნეამის დამეგობრების თაობაზე. 

ელჩი ქუთაისში დაესწრება ივლისის თვეში დაგეგმილ უეფას 21 წლამდე ნაკრებთა  ჩემპიონატის თამაშებს, სადაც  ისრაელის  გუნდი სამი თამაშს გამართავს.  ჩემპიონატის მსვლელობისას  საშუალება გვექნება ისრაელიდან ჩამოსულ სპორტსმენებს ქუთაისი უფრო კარგად გავაცნოთ.“- განაცხადა იოსებ ხახალეიშვილმა.


,,იმერეთის სხვადასხვა მუნიციპალიტეტებს ჰყავს დამეგობრებული ქალაქები ისრაელში. მისასალმებელია ის ფაქტი, რომ ისრაელის ახალი ელჩი ჩართულია ზოგადად იმერეთის და ისრაელის მომავალ თანამშრომლობაში. იმედი მაქვს ძალიან საინტერესო პროექტებს განვახორციელებთ ერთად.

დღევანდელ შეხვედრაზე გაჟღერდა, რომ ქუთაისის საერთაშორისო უნივერსიტეტსა და ისრაელის სხვადასხვა საგანმანათლებლო სტრუქტურებს შორის იწყება თანამშრომლობა, რაც ვფიქრობ დადებითად აისახება, როგორც უნივერსიტეტზე ისე ჩვენს ქალაქზე“ - ზვიად შალამბერიძე.

შეხვედრაზე ასევე ყურადღება გამახვილდა რეგიონში არსებულ ტურისტულ პოტენციალსა და ბიზნეს გარემოზე.