ზურაბ ჯაფარიძე: სავალდებულო ჯარს გავაუქმებ, ნარკომოხმარებისთვის მისჯილებს შევიწყალებ (ინტერვიუ)

ზურაბ ჯაფარიძე: სავალდებულო ჯარს გავაუქმებ, ნარკომოხმარებისთვის მისჯილებს შევიწყალებ (ინტერვიუ)

"გირჩის" საპრეზიდენტო კანდიდატი ზურაბ ჯაფარიძე აცხადებს, რომ პრეზიდენტობის შემთხვევაში სავალდებულო სამხედრო სამსახურს გააუქმებს. პრეზიდენტს ამ გადაწყვეტილების პირდაპირი უფლება არ აქვს, თუმცა ჯაფარიძე გეგმავს, რომ რამდენჯერაც მთავრობა განკარგულებას გამოსცემს იმდენჯერ გააუქმოს. ჯაფარიძე ასევე გეგმავს, რომ საპრეზიდენტო ვადის პერიოდში თავდაცვის ბიუჯეტი გაორმაგდეს.

ამის შესახებ ზურაბ ჯაფარიძემ "აიპრესთან" ინტერვიუში პრეზიდენტობის კანდიდატებთან ინტერვიუს ფარგლებში ისაუბრა. ჩვენ ინტერვიუებს ყველა ძირითად კანდიდატთან შემოგთავაზებთ. 

ჯაფარიძის კიდევ ერთი საპრეზიდენტო დაპირებაა, რომ ნარკოტიკების მოხმარებისთვის დაპატიმრებული პირები შეიწყალოს, ასევე მოუხსნას მათ პირობითი მსჯავრიც. გეგმა აქვს ნარკორეალიზატორებთან მიმართებაშიც. ამბობს, რომ ნარკოდამოკიდებულ პირებს კლინიკებში რეგისტრაციაზე დადგომის უფლება უნდა ჰქონდეთ. მისი მტკიცებით, ასეთ შემთხვევაში ქვეყანაში "ნარკობარიგები" აღარ იარსებებს. ამ თემაზე ჯაფარიძე ხელისუფლებას ულტიმატუმის ენით დაელაპარაკება. 

გეგმა აქვს ვეტოსთან დაკავშირებითაც. ამბობს, რომ ყველა იმ კანონს დაადებს ვეტოს, რომელიც მიმართული იქნება ადამიანის უფლებების შეზღუდვისკენ და შემდეგ პარლამენტში თავადვე ივლის, პარლამენტი ვეტოს აუცილებლობაში დაარწმუნოს. ჯაფარიძე საჯაროობისა და გახსნილობის პირობასაც დებს. ამბობს, რომ ასევე თვეში ერთხელ მინისტრებთან დებატებშიც დაჯდება.

რა საარჩევნო დაპირებები აქვს ზურაბ ჯაფარიძეს, მარიხუანას თემაზე რა ახალ ნაბიჯებს გადადგამენ, კიდევ რომელ სფეროზე გააკეთებენ აქცენტს და რას უპასუხებს იმ ადამიანებს, ვინც ბიძინა ივანიშვილის პროექტს უწოდებს. ამ საკითხებზე "აიპრესმა" ზურაბ ჯაფარიძესთან ვრცელი ინტერვიუ ჩაწერა:

მოგესალმებით, დიდი მადლობა რომ დაგვთანხმდით ინტერვიუზე. დასაწყისისთვის გეტყვით, რომ ცუდი მასპინძლობა გცოდნიათ...

რატომ?

მეგონა მარიხუანით დამხვდებოდით.

ეზოში ექნებათ, თუ დაგაინტერესებთ ინტერვიუს შემდეგ გადავინაცვლოთ. მაგის პრობლემა არ არის. ოღონდ მე თვითონ ვერ მოვიხმარ. 19:00-ზე კიდევ ერთი შეხვედრა მაქვს.

მუშაობის დროს არ ეწევით ხოლმე?

გააჩნია. თუ იგულისხმება ის, რომ რაღაც იდეა გვაქვს მოსაფიქრებელი. ისე, თუ საქმე მაქვს, დასაწერი მაქვს რაღაცა, ან მოსაფიქრებელი მაქვს რაღაც ისეთი, რასაც ფხიზელი გონება სჭირდება, მაშინ არა. კრეატიულ რაღაცებში გვეხმარება.

იდეებშიც გეხმარებათ?

მაგალითად, თუ გვინდა, რომ რაღაცა ვიდეორგოლი გავაკეთოთ ისეთი, რომ განსხვავებული კუთხიდან დავანახოთ მოქალაქეებს, ამ განსხვავებულ ხედვას სჭირდება იუმორი, ამაში გვეხმარება. მე თუ მოვიხმარ მარიხუანას, განტვირთვისთვის მოვიხმარ. იშვიათად მოვიხმარ, იმიტომ რომ დასვენებისთვის ბევრი დრო არ მაქვს.

ხშირი მომხმარებელი არ ხართ?

არა. ახლა აღარ ვარ. ხშირი მომხმარებელი ვიყავი წლების წინ ახალგაზრდობაში.

ინტერვიუ ისევ მარიხუანას თემით გავაგრძელოთ, იუმორისტულიდან სერიოზულ ნაწილზე გადავერთოთ. საკონსტიტუციო სასამართლომ გამოიტანა განაჩენი მარიხუანას მოხმარების ლეგალიზების თაობაზე. ალბათ აკვირდებით ამ დღეებს, რა შედეგი მოიტანა?

მე არ მივიჩნევ, რომ ასე, ყოველდღიურ ცხოვრებაში რაღაცა შეიცვალა. რასაც გარშემო ვხედავ არის ის, რომ ადამიანებს პოლიციის შიში მოეხსნათ. იციან, რომ მარიხუანას მოხმარების გამო პოლიცია მათ ვეღარ დააჯარიმებს. სხვა მხრივ არაფერი განსაკუთრებული არ მომხდარა. ადამიანები, ვინც ისედაც მოიხმარდა მარიხუანას, ისევ მოიხმარენ. ვისაც ინტერესი არ ჰქონდა, არც ახლა დააინტერესებს. მათ შორის არც ის მომხდარა, რასაც ამ თემის მოწინააღმდეგეები საუბრობდნენ, რომ მარიხუანა ქუჩაში დაიყრებოდა, პატარა ბავშვები დაიწყებდნენ მოწევას და რაღაც საშინელება დატრიალდებოდა. ხალხი ქუჩაში დაიწყებდა გაბოლებას და ა. შ. არაფერი ასეთი არ ხდება.

თუმცა, ქუჩებშიც ეწევიან. მათ შორის სადარბაზოებშიც მინახავს რომ ეწევიან... მაგალითად, ჩემს კორპუსში აქამდე თუ სარდაფში, ან ასეთ ადგილებში ეწეოდნენ, ახლა ამან ქუჩაში გადაინაცვლა...

კარგია რომ ჯურღრმულებში სიარული აღარ უწევთ. ზოგადად კატასტროფული არაფერი მომხდარა. უბრალოდ, ახლა გაუგებარი სიტუაცია გვაქვს, როცა მოხმარება დაშვებულია და მცენარის მოპოვება ისევ აკრძალულია. გაზრდა, მოყვანა ან ყიდვა შეუძლებელია. საბოლოო ჯამში ეს საქართველოს პარლამენტის გადასაწყვეტი იქნება, რომ გარკვეული რეგულაციების მიმართულებით წავიდეს და სავარაუდოდ საერთაშორისო გამოცდილებას გადმოიღებენ.

სხვადასხვაგვარ რეგულაციებზეა საუბარი. მაგალითად, უნდა აიკრძალოს პარკებში და სკვერებში მოწევა, ასევე არასრულწლოვნების თანდასწრებით. თქვენ რომელ რეგულაციას ემხრობით?

ჩვენ არ ვართ ის ხალხი, სადაც ასეთი რეგულაციები მუშაობს. თუმცა, შემიძლია წარმოვიდგინო რა მიმართულებით წავა რეგულაციებზე მუშაობა. არის სამი ძირითადი მიმართულება და კიდევ პატარ-პატარა მიმართულებებია. პირელი, ეს არის ასაკობრივი ზღვარი. თუ სწორად მახსოვს, თამბაქოს და ალკოჰოლის მიყიდვა 21 წლამდე არ შეიძლება. აქაც იქნება ასაკობრივი ზღვარი შემოღებული. მეორე ეს არის მარკირება, რომ ამ ნივთიერების გამოყენება შეიძლება იყოს ჯანმრთელობისთვის საზიანო და მესამეა ფასის კონტროლი, რომ ის არ იყოს ძალიან იაფი და არ იყოს ძალიან ხელმისაწვდომი.

გჯერათ, რომ გაყიდვა დაშვებული იქნება?

მგონია, რომ საბოლოო ჯამში მანდამდე მივალთ.

ეს არის შემდეგი ნაბიჯი, რაზეც „გირჩი“ იბრძოლებს?

ჩვენ აღარ ვაპირებთ პროაქტიურად რაღაც ღონისძიებების გატარებას. მათ შორის საკონსტიტუციოში წასვლას. ჩვენ ვაპირებთ, სხვა თემებზე გადართვას, რაც ჩვენი აზრით ასევე მნიშვნელოვანია. საკონსტიტუციოს 2 გადაწყვეტილებით ჩვენ შევქმენით ფუნდამენტი, რომელიც შეუძლია გამოიყენოს ნებისმიერმა სხვა მოქალაქემ, ვისაც სურს ამ მიმართულებით ბრძოლის გაგრძელება. ჩვენ ვაპირებთ განათლების თემაზე გადართვას და ამ თემაზე სერიოზული პროექტების გაკეთებას. ეს არ ნიშნავს, რომ ნარკოპოლიტიკაზე პოზიციას აღარ გამოვხატავთ, ან ამ თემას საერთოდ გამოვეთიშებით.

ერთ-ერთი მთავარი არგუმენტი, რაც მარიხუანას მოხმარების ლეგალიზაციის მოწინააღმდეგეებს არგუმენტად მოაქვთ ხოლმე, საჭესთან მარიხუანას მოხმარებაა. მაგალითად, ალკოჰოლის დროს პოლიციას შეუძლია გამოიყენოს ალკოჰოლზე შესამოწმებელი აპარატი. ამ შემთხვევაში როგორ მოხდება, არის ასეთი აპარატი? როგორია საერთაშორისო გამოცდილება ამ მხრივ?

მარიხუანას დადგენაც შესაძლებელია. არა მხოლოდ მარიხუანას, არამედ სხვადასხვა ტიპის ნივთიერებების დადგენა. თუ სწორად მახსოვს ნერწყვზეა ეს ტესტი. იქვე მყისიერად ადგენს. ამერიკის რამდენიმე შტატში კეთდება ეს. ასეთი ტიპის ტესტი თუ უნდათ არსებობს, მაგრამ მაგის გარდა არსებობს კლინიკური ნიშნები. შეიძლება პოლიცია ჰქონდეს ეჭვი, რომ ადამიანს მარიხუანა აქვს მოხმარებული და შეიძლება მაგ შემთხვევაში მოხდეს შემოწმება. ამ შემთხვევაში მნიშვნელოვანია დადგინდეს კონცენტრაცია, არის თუ არა ის მაღალი, რომ ადამიანს მანქანის მართვაში უშლიდეს ხელს. იმიტომ, რომ ადამიანს მარიხუანა შეიძლება ჰქონდეს მოხმარებული წინა დღეს, ან რამდენიმე დღის წინ და ის სისხლში რჩება 1 თვე, თუმცა ეს არ ნიშნავს რომ ადამიანს მანქანის მართვა არ შეუძლია. ალკოჰოლიც რომ მოიხმარონ, მისი რაღაც ნარჩენები ორგანიზმში რჩება მეორე და მესამე დღესაც, მაგრამ ადამიანები ხომ ჯდებიან საჭესთან?! პოლიციელს თუ ეჭვი ექნება, შესაძლოა ჰქონდეს იმის უფლება, რომ კლინიკური ნიშნები დაადგინოს. ის ტესტიც, რომელშიც აბერინებენ, არ არის 100%-იანი სიზუსტის. საბოლოო ჯამში ლაბორატორიულად დგინდება. ალკოჰოლის რა კონცენტრაციაა სისხლში.

მარიხუანას თემაზე საუბრისას თქვენც, თქვენი პარტიის სხვა წევრებიც ხშირად აკრიტიკებთ, ან დასცინით პარტიებს. მაგალითად ბაქრაძის პოზიციაზე ხუმრობდით, „თეთრი ხმაურის მოძრაობაც“ მსუბუქად გააკრიტიკეთ, თქვით რომ მისი პოზიცია ცოტა გაუგებარი იყოვო. რატომ აკეთებთ ამას?

„თეთრი ხმაურის მოძრაობასთან“ არის რაღაცები, სადაც თანხვედრა გვაქვს და არის რაღაცები, სადაც განსხვავებული ხედვები გვაქვს. ეს ძირითადად არის პასუხისმგებლობის თემაზე, სად გადის ადამიანის პასუხისმგებლობისა და სახელმწიფოს პასუხისმგებლობის საკითხი. ჩვენ ვამბობთ, რომ ადამიანი საკუთარი სხეული ბატონ-პატრონია და თავის სხეულს რასაც უნდა იმას უზამს, მათ შორის თუ უნდა მიაყეებს ზიანს, ეს არის მისი

პასუხისმგებლობა და არავისი სხვისი. შესაბამისად, ჩვენ არ ვართ მხარდამჭერები სახელმწიფომ სხვადასხვა პროგრამები აფინანსოს ნარკომომხმარებლებისთვის. სხვა გადამხდელები არაფერ შუაში არ არიან, რომ რაღაცაში დაეხმარონ. ჩვენ ვამბობთ, რომ დეკრიმინალიზაცია იმდენად მნიშვნელოვანია, რომ თუ სახელმწიფო ამაზე წამოვა, მზად ვართ რაღაცაზე თვალი დავხუჭოთ...

„თეთრი ხმაურის მოძრაობას“ სოციალისტური მიდგომა აქვს და ამბობენ, რომ თავისი სხეულის ბატონ-პატრონი ადამიანი ბოლომდე არ არის და ადამიანის სხეული სოციუმსაც ეკუთვნის და თუ ადამიანი მას დააზიანებს საზოგადოებაა პასუხისმგებელი და დაუფინანსოს მკურნალობა და რეაბილიტაცია.

პოლიტიკურ პარტიებს რაც შეეხება, ჩვენ ვხუმრობთ და ვერთობით ხოლმე. განსაკუთრებით, ისეთ პარტიებსა და ლიდერებზე, რომლებიც ცდილობენ, რომ მხოლოდ და მხოლოდ პოზიტიურ სიახლეებთან იყვნენ ასოცირებულები. ასეთ თემებზე კი ქრებიან და არ ჩანან ხოლმე.

კი, მაგრამ ხომ შეიძლება იგივე ბაქრაძეს არ ჰქონდეს ჩამოყალიბებული პოზიცია და ამიტომ არ გამოხატავდეს პოზიციას? ჰქონდეს ე.წ. შუაშისტური პოზიცია...

კი, როგორ არა. გულწრფელად რომ გითხრათ, საერთოდ არ მაღელვებს რა პოზიცია ექნება ბაქრაძეს. ვიცნობ მას, მქონია ურთიერთობა და ვიცი მისი პოზიცია. ვიღაცები ერთობოდნენ მაგაზე, რომ ბაქრაძეს დაეფიქსირებინა პოზიცია.

თქვენ იყავით ერთ პარტიაში, მაშინ დეკრიმინალიზაციას ეწინააღმდეგებოდა?

კი. იმის მომხრე, რომ მარიხუანას მოხმარების ლეგალიზაცია მომხდარიყო და მაშინდელი „ნაცმოძრაობის“ დღის წესრიგის თემა გამხდარიყო, ვიყავით მხოლოდ 2 ადამიანი - მე და გოგა ხაჩიძე. იყვნენ პარტიის შიგნით ადამიანები, ვინც ამბობდნენ, რომ მართალია, მაგრამ არ გვინდა და ამაზე ნუ ვილაპარაკებთ, იმიტომ რომ ხალხში არ არის პოპულარული თემა და იყვნენ ადამიანები, რომლებიც ამის კატეგორიული წინააღმდეგები იყვნენ.

პოპულისტური თემები უფრო აინტერესებდათ?

კი. პენსიები იყო მათი საყვარელი თემა. თუ აკვირდებოდით, სანამ იქ ვიყავი პენსიები არ იყო „ნაცმოძრაობის“ თემა, როცა წამოვედი, მეორე დღიდან ყველამ პენსიაზე დაიწყო ლაპარაკი. გაიყვნენ ორად და ორივე ნაწილი პენსიებზე ლაპარაკობენ.

მარიხუანას მოხმარების ლეგალიზება მკვეთრად უარყოფითად შეაფასა საქართველოს პატრიარქმაც. რას იტყვით ამაზე?

მე მჯერა, რომ საქართველოში არიან ჯგუფები, რომლებიც კონსერვატორული შეხედულების არიან და გასაგებია რომ მათთვის ეს მიუღებელია. ეს მარტო საქართველოში არ ხდება. თუმცა, საქართველოში მგონია, რომ სხვა რაღაცის გამო ხდება. ჩემი დაკვირვებით, საპატრიარქოს „გირჩი“ თუ ჩვენს მიერ დაფუძნებული რელიგიური ორგანიზაცია „ბიბლიური თავისუფლება“ ახსენდება ხოლმე მაშინ, როცა პოლიტიკურ დისკუსიაშია ისეთი თემები, რომელიც საპატრიარქოსთვის დამაზიანებელია. ბოლო პერიოდში ასეთი თემა „ციანიდის საქმეა“. როგორც კი ამაზე ხალხი მსჯელობას იწყებს, იმდენჯერ საპატრიარქო, პატრიარქი ან რომელიმე ეპისკოპოსი ქადაგებაში ან „გირჩზე“ იძახიან რაღაცას, ან ნარკოპოლიტიკაზე, ან „ბიბლიურ თავისუფლებაზე“. მგონია, რომ ეს არის მცდელობა ყურადღება სხვა რამეზე გადაიტანონ. საკონსტიტუციო სასამართლოსთან გამართული აქციაც გადაფარვის მცდელობაა. ვუსმინე იქ შეკრებილ ადამიანებს და წარმოდგენა არ აქვთ რა უნდათ.

მე მჯერა, რომ საქართველოშიც არიან ჯგუფები, ვისაც გულწრფელად უნდა რომ რაც შეიძლება ნაკლები ნარკომომხმარებელი იყოს. მიზანი საერთო გვაქვს, მაგრამ ხედვებშია განსხვავება. მათ ჰგონიათ, რომ შედეგი პოლიციის დევნით მიიღწევა, ჩვენ ეს გავლილი გვაქვს საბჭოთა კავშირიდან მოყოლებული. შედეგი არის ის, რომ ბოლო წლებში ნარკომომხმარებლების რიცხვი საქართველოში 40 000-დან 50 000-მდე გაიზარდა.  უნდა მიხვდნენ, რომ რაღაც შესაცვლელია. ეს რაღაც ლიბერალური მიდგომით სიარულია, რა გამოცდილებაც დედამიწაზე ძალიან ბევრ ქვეყანას აქვს. ეს არ ნიშნავს, რომ ნარკომომხმარებლები გაქრნენ და პრობლემები მოიხსნა. მაგრამ, გაცილებით ნაკლები პრობლემებია, ვიდრე ჩვენნაირ ქვეყნებში.

ირმა ინაშვილმა მოგიძღვნათ პოსტი და თქვა რომ ზურაბ ჯაფარიძეს ალბათ თვითონ უნდა პატრიარქობა და ამიტომ აკრიტიკებს პატრიარქსა და საპატრიარქოსო. ასევე თქვა რომ ვინ დანიშნა ჩვენი სულების დირექტორადო. რა პასუხი გაქვთ?

ვუყვარვარ მე ქალბატონ ირმას. არ მინახავს ინაშვილის კომენტარი. მე არც სულზე და არც ხორცზე დირექტორობის სურვილი არ მაქვს. სულზე მით უმეტეს, რომელზეც რელიგიურმა ლიდერებმა უნდა იზრუნონ. მათგან და სხვა პარტიებისგან განსხვავებით, ჩვენ ხორცზე ბატონობაც კი არ გვინდა, თავისუფლება გვინდა. ყველას ვეუბნებით, რომ თქვენ თვითონ მიხედეთ საკუთარ თავს. ჩვენ გვინდა თავისუფლება, რასაც შემდეგ მოჰყვება ადამიანების პასუხისმგებლობა.

თქვენ გქონდათ დაუმორჩილებლობის რიგი აქტები დააანონსებული. გარდა მარიხუანასთან დაკავშირებული ქმედებებისა და იმ ჯარიმისა, რომელიც სასამართლოს განაჩენის მიუხედავად არ გადაიხადეთ. სხვა რა გააკეთეთ, ან თუ აპირებთ რაიმეს უახლოეს მომავალში?

Facebook-Live გვქონდა და პირდაპირ ეთერში ვითამაშეთ ლოტო ფულზე. ესეც აკრძალულია. ერთ კომპანიას აქვს მინიჭებული მონოპოლია, ლატარეის კომპანიას რომელსაც აქვს მინიჭებული ლატარეის მოწყობის უფლება. საჯაროდ დავარღვიეთ ერთხელ კანონი და საჯაროდ ვითამაშეთ ლოტო ფულზე. ამას სახელმწიფოს მხრიდან რეაგირება არ მოჰყოლია, მაგრამ პრინციპის დონეზე გვინდოდა თქმა, რომ არასწორია, როცა ერთ კომპანიას აძლევს სახელმწიფო მონოპოლიას, თუნდაც ასეთი ტიპის თამაშებზე.

საბოლოო გადაწყვეტილებაა, რომ საპრეზიდენტო არჩევნებში მიიღებთ მონაწილეობას?

კი, რა თქმა უნდა.

იმიტომ გეკითხებით, რომ წინა 2 არჩევნებშიც იღებდით მონაწილეობას, მაგრამ საბოლოოდ აღარ იყარეთ კენჭი...

ამჯერად გვინდა, რომ ეს იყოს პირველი არჩევნები, სადაც მათ შორის საკუთარ თავს დავტესტავთ. გვაინტერესებს როგორია არჩევნებში „გირჩი“.

საბოლოოდ „გირჩის“ სახელით იყრით კენჭს თუ დამოუკიდებლად?

მე მგონია, რომ „გირჩი“ მაინც ჩემთან არის აფილირებული და ამას ვერავინ ვერ ჩამომხსნის, მაგრამ ოფიციალურად ცესკო არ გვაძლევს მაგის უფლებას. კანონში აქვთ ჩანაწერი, რომ კანდიდატმა პარტიის სახელით რომ იყაროს კენჭი, პარტია წინა არჩევნებზე უნდა იყოს რეგისტრირებული. ვინაიდან „გირჩს“ არ მიუღია წინა არჩევნებში მონაწილეობა, გვეუბნებიან რომ კანდიდატს ვერ დავაყენებთ. დამოუკიდებელი კანდიდატი ვიქნები, რომელსაც საინიციატივო ჯგუფი წარადგენს.

ბიძინა ივანიშვილმა როცა ისაუბრა დამოუკიდებელ კანდიდატზე, თქვენც ხომ არ გგულისხმობდათ?

ცუდი არ იქნებოდა. ზურაბიშვილის გაოცებულ სახეს ვნახავდი.

დღეს (ინტერვიუ ჩაწერილია ორშაბათს, 6 აგვისტოს ავტ:) დაადასტურა სალომე ზურაბიშვილმა რომ არჩევნებში იყრის კენჭს, როგორი შთაბეჭდილება დაგრჩათ?

არც ისე პოზიტიური. უფრო სწორად საერთოდ არ დამრჩა პოზიტიური შთაბეჭდილება. ძალიან ხელოვნურია ეს ყველაფერი. განცდა დამრჩა, რომ გააზრებულიც კი არ აქვს. აქცენტი ემიგრანტებზე, მშვიდობასა და გამაერთიანებლის როლზე. არაფერი არ თქმულა საინტერესო.

მას შემდეგ, რაც „ნაციონალური მოძრაობიდან“ წამოხვედით ხშირად გაკავშირებდნენ ხან მიშასთან და ხან ბიძინასთან. ერთ ინტერვიუში მითხარით, რომ როგორც დავამტკიცეთ მიშას პროექტი არ ვართ, ასევე დავამტკიცებთ, რომ არც ივანიშვილის პროექტი ვარო. დაამტკიცეთ?

მოსახლეობის დიდი სეგმენტისთვის კი. ჩვენი მხარდამჭერები, რომლებიც დიდი ხნის განმავლობაში გვიყურებდნენ, აზრიანი ადამიანები არიან და მათ შორის გადახედეს ჩემს წარსულსაც, იაგო ხვიჩიას, ვახო მეგრელიშვილის და სხვების წარსულს, ნახეს რომ თანმიმდევრული ხალხი ვართ, ნახეს ჩემი 7-8 წლის წინანდელი გამოსვლები თუ სტატიები, რაზეც პოზიცია დღესაც არ შემიცვლია მიხვდნენ რომ ჩვენ ვართ ის პარტია, რომელსაც რაღაცების სჯერა. ამ შემთხვევაში ნაკლებად გვაღელვებს ივანიშვილი იქნება ჩვენი მხარდამჭერი თუ ვინ. ვინც მხარს დაგვიჭერს, განსაკუთრებით ფინანსურად, ძალიან გაგვიხარდება.

თანახმა ხართ ივანიშვილის დაფინანსება მიიღოთ?

არანაირი პრობლემა არ მაქვს. ჩემთვის მთავარია, რომ არ დამჭირდეს ისეთ საკითხებზე უკანდახევა, რაც ჩემთვის პრინციპული საკითხებია. თუ ფინანსურ დახმარებას ვალდებულებები არ მოჰყვება, მზად ვარ მივიღო. ვინც მეტ ფულს მომცემს, გამიხარდება.

ნელა, მაგრამ ფაქტი სახეზეა, რომ ხელისუფლება თქვენს იდეებს იღებს. იგივე საკონსტიტუციო სასამართლომ გაიზიარა თქვენი პოზიცია. იგივე მცირე მთავრობის კონცეფციის იდეაც მიიღო „ოცნებამ“ და დაიწყო ამ მიმართულებით მუშაობა. თქვენი მოწინააღმდეგეების არგუმენტი მარიხუანაზე მსჯელობისას ესეც არის ხოლმე, რომ ის რაც ვერ გაბედა „ოცნებამ“ და ივანიშვილმაო ზურაბ ჯაფარიძესა და „გირჩს“ გააკეთებინა თავისი აქტიურობითო. რა პასუხი გაქვთ ამაზე?

მსმენია ასეთი რაღაცები, მაგრამ გულწრფელი რომ ვიყო ნაკლებად მაღელვებს. წავიკითხე კონსპირაციის თეორიები, რომ ეს ყველაფერი სინამდვილეში სადღაც ზემოთ იყო დაგეგმილი, რაღაცა თამაში გათამაშდა და ა. შ. მარიხუანას თემაზე მე საუბარი დავიწყე სადღაც 2005-06 წლებში, როცა გაეროში ვმუშაობდი და ამაზე ჩემი გამოსვლები და სტატიები სადღაც 2010 წლიდან დაიწყო, როცა ბიძინა ივანიშვილის პოლიტიკაში ჩართვის შესახებ არავინ არაფერი იცოდა. იმის მერე აზრი არ შემიცვლია და მივდიოდი ამ აზრისკენ.

არ გაღელვებთ ასე რომ ფიქრობენ ადამიანები, რომლებიც შესაძლოა თქვენი პოტენციური ამომრჩეველი იყოს?

არ მაღელვებს. თუ სჯერათ ასეთი რაღაცების რა ვუყო. ჩემთვის მთავარია რომ მარიხუანაზე შედეგზე გავედით. სავალდებულო სამხედრო სამსახურის თემაზე კი კონკრეტული ხვრელი გავაჩინეთ. ჩემთვის მთავარია, რომ სისტემა გავარღვიეთ რამდენიმე მიმართულებით. ეს ჩემთვის იგივეა, როცა იძახიან რომ სოროსი მართავს ვიღაცებსო.

დღემდე წერენ ჩვენ გვერდზე Facebook-ში რომ „გირჩი“ სააკაშვილის პროექტია. დაიშალეთ და მერე ისევ გაერთიანდებითო. „ნაცმოძრაობის“ მხარდამჭერები პირიქით ივანიშვილის პროექტს გვიწოდებს. თავიდან, როცა პარტია გავაკეთეთ ვხარჯავდი დროს რომ პასუხები გაგვეცა. ახლა ამაზე დროს აღარ ვხარჯავ.

ის ადამიანები სად არიან, ვისთან ერთადაც წამოხვედით „ნაცმოძრაობიდან“ და "გირჩი" დააფუძნეთ? აღარ არიან აქტიურები და პარტიაში რჩებიან?

გოგი [გიორგი მელაძ] რას აკეთებს არ ვიცი. ვიცი რომ სიგარეტს დაანება თავი და სოცქსელში ვურთიერთობთ ხოლმე. გოგა ხაჩიძე დაუბრუნდა თავის საოცნებო საქმეს- მუსიკას, 1-2-ჯერ ვნახე და მათ შორის მისი მუსიკაც მოვისმინე. პალიკო კუბლაშვილმა ბიზნესი გააკეთა როგორც ვიცი...

„გირჩისგან“ დისტანცირება გააკეთეს?

პოლიტიკისგან გააკეთეს დისტანცირება. რაღაცები თუ მჭირდება ხოლმე, რჩევა და რაღაცა ვეხმიანები ხოლმე. კომუნიკაცია გვაქვს, მაგრამ მაინც თავისი ცხოვრებით ცხოვრობენ.

დაახლოებით ერთი წლის წინ, როდესაც ვრცელი ინტერვიუ გქონდათ ჩვენთან, მაშინ მითხარით ასეთი ფრაზა, რომ სისტემა, რომელიც დამპალია უნდა არყიო და ანჯღრიო. არყიეთ მარიხუანაზე და შედეგი დადეთ, არყიეთ სავალდებულო სამხედრო სამსახურის გაუქმებასთან დაკავშირებით და აქაც არის წინგადადგმული ნაბიჯები. რას აპირებთ სხვა მიმართულებით? იგივე ეკონომიკასთან დაკავშირებით გაქვთ ხოლმე ხედვები, იგივე განათლებაც ახსენეთ... რა გეგმები გაქვთ ამ თვალსაზრისით?

ეკონომიკასთან მიმართებაში ისეთი შედეგი ვერ გვაქვს, მაგრამ რაც გვაქვს, ჩვენთვის პრინციპული საკითხია, რომ მთავრობის ხარჯების მოცულობა მთლიანი ეკონომიკის ზომასთან მიმართებაში შემცირდეს. რასაც მივაღიწეთ არის ის, რომ მთავრობის მოცულობა არ გაზრდილა. ვერ დავიბრალებ, რომ ეს მთლიანად „გირჩის“ დამახურებაა, მაგრამ „გირჩი“ ერთ-ერთი ყველაზე აქტიური იყო ამ მხრივ. ნაწილობრივ ჩვენი დამსახურებაა ისიც, რომ სამინისტროების რაოდენობა შემცირდა. თუმცა, ეს ზღვაში წვეთია, ბევრად მეტია მანდ გასაკეთებელი. რაღაც იდეები გვაქვს რაც უნდა გაკეთდეს.

ახლა ამ წუთას, რაზეც ფოკუსირება უნდა მოვახდინოთ განათლების სისტემაა. გვინდა, რომ განათლების სისტემის ნჯღრევა დავიწყოთ. ისე, როგორც მანამდე ვანჯღრევდით ნარკოპოლიტიკაზე არსებულ სისტემას, ან სავალდებულო სამსახურზე.

გაქვთ იდეები ამ თემაზე?

კი. ზუსტად როგორ ფორმას მივცემთ ამაზე ალბათ მერე ვისაუბრებთ, ჯერ კიდევ რაღაცებზე ვფიქრობთ, მაგრამ მთავარი იდეა არის ის, რომ ადამიანს უნდა ჰქონდეს უფლება გააკეთოს ისეთი სკოლა როგორიც მას სურს. მოქალაქეებს კი უნდა ჰქონდეთ ისეთი უფლება, რომ საკუთარი შვილები მიიყვანონ ისეთ სკოლაში, როგოორიც მათ სურთ. თუ ადამიანი აკეთებს სკოლას და თუ არსებობენ მშობლები, რომლებსაც საკუთარი შვილები მიჰყავთ ამ სკოლაში და ენდობიან მას, სახელმწიფოს საქმე არ არის, რომ ჩაერიოს ამ ადამიანების ურთიერთობაში. ჩვენ ვამბობთ, რომ სახელმწიფო არ უნდა არეგულირებდეს ამ საკითხებს.

კერძო სკოლებზე საუბრობთ და არა საჯაროზე, ასეა?

დიახ. კერძო სკოლები დღესაც არსებობენ, მაგრამ სახელმწიფო იძახის როგორი უნდა იყოს სკოლა, რამდენი საათი უნდა იყოს გაწერილი, რა ასაკის ბავშვი უნდა შევიდეს, როგორ უნდა იჯდნენ კლასებში და ა. შ. ჩვენ ვიძახით, რომ ეს სახელმწიფოს საქმე საერთოდ არ არის. მე შემიძლია გავაკეთო განსხვავებული სკოლა და მათ შორის ავაწყო თანამედროვე მეთოდებით და ვიპოვო მშობლები, რომლებიც მზად არიან საკუთარი შვილები მოიყვანონ ამ სკოლაში.

ანუ, რეგულაციებს არ უნდა ექვემდებარებოდეს?

დიახ. მე თუ მინდა, რომ განათლება მივიღო და მასწავლიდეს ვიღაცა და მასაც უნდა რომ მასწავლიდეს, ეს ჩვენი საქმეა და სახელმწიფოს საქმე საერთოდ არაფერ შუაში არ არის. ამ მიმართულებით მინდა ვიბრძოლოთ და მგონია, რომ ამას მოვიგებთ. მგონია, რომ ცენტრალიზებულ, ინფიცირებულ საშინელ მონსტრს, რომელსაც განათლების სისტემას ვეძახით, რაც სინამდვილეში ბავშვებისთვის ციხეა, ამას დავანგრევთ.

ამ თემაზეც აპირებთ დაუმორჩილებლობის აქციებს?

ფორმა მოფიქრებული გვაქვს, მაგრამ გადაწყვეტილება ჯერ არ გვაქვს მიღებული. ამის ნაწილი შეიძლება იყოს სარჩელი საკონსტიტუციო სასამართლოში, შეიძლება იყოს დაუმორჩილებლობის აქტიც. შეიძლება სკოლის გაკეთებაც იყოს. შეიძლება ყველაფერი იყოს, არც ამას გამოვრიცხავ. თქვენ ხართ პირველი მედიასაშუალება ვისთანაც ამ თემაზე მეტ-ნაკლებად ვრცლად ვსაუბრობ. ჩათვალეთ, რომ ვაანონსებ. „გირჩი“ აპირებს ფოკუსირება მოახდინოს, ამაზე და განათლების არსებული სისტემა დავშალოთ. როგორც მინიმუმ გამოვხრათ და გავაჩინოთ თავისუფალი სივრცეები. რაც იმის საშუალებას მისცემს მოზარდების რაღაც ნაწილს მაინც, რომ ნორმალური ადამიანური განათლება მიიღოს და ისე არ დაიკარგოს, როგორც იკარგება დღევანდელი განათლება გავლილი 99%.

ამის პრაქტიკა არსებობს მსოფლიოში?

კი. ჩვენ რასაც გავაკეთებთ საერთაშორისო პრაქტიკაზე იქნება დაფუძნებული. ბევრგან არის ასეთი სისტემა. მაგალითად, აშშ-შია ასეთი თავისუფალი სტილის სკოლები. მათ შორის არის ე.წ. Home სკოლები. შეიძლება რამდენიმე მცირე ჯგუფი იყოს, რომელსაც სახლში ასწავლიან. დიდი უნივერსიტეტები თანაბარი პირობების შემთხვევაში უპირატესობას სწორედ Home სკოლებს ანიჭებენ. პრაქტიკა აჩვენებს რომ ესენი უფრო წარმატებულები არიან.

საუნივერსიტეტო განათლებაზე არ გაქვთ იდეები?

ჩვენ გვგონია, რომ სასკოლო განათლებას თუ კარგად გაივლის ახალგაზრდა, მერე თავად გაარკვევს, სად წავა და სად გააგრძელებს სწავლას. ძირითადი პრობლემა მგონია, რომ საშუალო განათლებაში გვაქვს. მანდ ხდება ბავშვებში კრეატიულობის, ცნობისმოყვარეობის და თავისუფლების სურვილის ჩაკვლა და განათლებისადმი ზიზღის გაჩენა.

უშუალოდ საპრეზიდენტო კამპანიის ფარგლებში რა არის თქვენი მთავარი საარჩევნო დაპირებები?

ჩვენ გვაქვს ვებ-გვერდი jafara.ge სადაც ჩამოთვლილია ჩემი დაპირებები. ერთის გარდა ყველა იმ უფლებამოსილებებიდან გამომდინარეობს, რომელიც პრეზიდენტს აქვს. სულ ტყუილად ჰგონიათ ხალხს, რომ პრეზიდენტს არ აქვს უფლებამოსილებები. საკმარისი უფლებამოსილებები აქვს იმისთვის თუ რამის გაკეთება უნდა, რამე შეცვალოს.

„გირჩს“ არ აქვს არცერთი თანამდებობა და გარე აქტიურობით რაღაცა შევცვალეთ ამ ქვეყანში. საპპრეზიდენტო ტრიბუნა თუ გვექნება გაცილებით მეტს შევძლებთ. სამი ძირითადი ფოკუსი მაქვს აღებული. ერთი ეხება თავდაცას, პრეზიდენტი მთავარსარდალია და ორი მნიშვნელოვანი დაპირება მაქვს ამ მიმართულებით. ერთი ეს არის სავალდებულო სამხედრო სამსახურის გაუქმება და მეორე თავდაცვის ბიუჯეტის გაორმაგება შემდეგი 6 წლის განმავლობაში. იცით, რომ ეს ვადა ერთჯერადად არის 6 წლიანი. გაორმაგება არ არის პრეზიდენტის უშუალო კომპეტენცია, მაგრამ დარწმუნებული ვარ პრეზიდენტის ტრიბუნის აქტიური გამოყენების შემთხვევაში პარლამენტს მოუწევს თავდაცვის ბიუჯეტის გაორმაგება.

სავალდებულო სამხედრო სამსახურის გაუქმებას „ოცნების“ გარეშე მოახერხებთ?

კი. გაწვევა ხდება მთავრობის დადგენილებით. პრეზიდენტს შეუძლია განკარგულება გააუქმოს. ანუ რამდენჯერაც გამოსცემენ გაწვევაზე განკარგულებას იმდენჯერ გავაუქმებ. 6 წელი ვერავის გაიწვევენ, 6 წლის შემდეგ თუ კიდევ დარჩება ეგ სისტემა შეიძლება ვინმე გაიწვიონ. ეს არის ჩემი პრინციპული გადაწყვეტილება.

მეორე დაპირება მაქვს შეწყალების უფლებასთან დაკავშირებით. ადამიანი არ არის დამნაშავე, თუ არ არსებობს დაზარალებული. მაგალითად, ნარკოტიკის მოხმარებისთვის თუ ვინმე იხდის სასჯელს, პირობითი აქვს ან უფლებები აქვს შეზღუდული, შეწყალების გზით ყველაფერს გავაუქმებ.

რეალიზატორს რაც შეეხება?

ულტიმატუმს მივცემ ხელისუფლებას, რომ ნარკოპოლიტიკა შეცვალოს. იმ სახით რა სახითაც დღესაა, რომ ნარკორეალიზატორებს „ბარიგებს“ რომ ეძახიან და ყველას ეზიზღება, ფიზიკურად არ იარსებებენ. მივცემ ხელისუფლებას ვადას და თუ იმ ვადაში შეცვლიან პრობლემა აღარ იქნება.

რას გულისხმობს ეს?

დიდი ნაწილი არასამთავრობოების მომზადებულ პაკეტშია. ეს გულისხმობს მოხმარების სრულ დეკრიმინალიზაციას. ადამიანები ამის გამო სისხლის სამართლით არ უნდა ისჯებოდნენ. დოზები მაინც უნდა იყოს განსაზღვრული. გასაგებია რომ მე რადიკალური ხედვები მაქვს, მაგრამ არ ვითხოვ რომ მაინცდამაინც ჩემი ხედვები გატარდეს, შეიძლება შუალედური კომპრომისული ვარიანტი იყოს მიღებული. რამდენიმე მილიგრამიანი MDM-ის მოხმარებისთვის ადამიანები ციხეში არ უნდა ისხდნენ. ასეთ რაღაცას თუ გაატარებენ, „ბარიგები“ ბუნებაში აღარ იარსებებენ.

თუ მძიმე ნარკოტიკს გახდი ლეგალურს და კლინიკებს ექნებათ საშუალება, რომ ნარკოდამოკიდებული ადამიანი რეგისტრაციაზე დადგნენ და მიიღოს ის დოზა, რაც მას უნდა, „ბარიგა“ აღარ იარსებებს.

მესამე მნიშვნელოვანი დაპირება ეხება ვეტოს ფუნქციას. პრეზიდენტს აქვს ეს უფლება. გასაგებია რომ „ოცნებას“ საკონსტიტუციო უმრავლესობა აქვს და ნებისმიერი ვეტოს დაძლევის ბერკეტი აქვს. მე დავადებ ვეტოს ყველა იმ კანონს, რომელიც მიმართული იქნება ადამიანის უფლებების შეზღუდვისკენ და ასეთი ალბათ კანონების დიდი ნაწილი იქნება. მერე მე თვითონ ვივლი პარლამენტში და 150 დეპუტატის წინაშე დავიცავ ჩემ ვეტოს. როდესაც საღ აზრს აჟღერებ, არც ისე ადვილია პარლამენტარისთვის ამ საღი აზრის წინააღმდეგ წავიდეს.

პრეზიდენტის სავარძლიდან ეკონომიკური ხედვების რაღაცა ფორმით რეალიზება თუ არის შესაძლებელი?

ამის პირდაპირი უფლებამოსილება არ მექნება, მაგრამ პრეზიდენტის ტრიბუნა ძლიერი ტრიბუნაა. ყოველ დილას შემიძლია გამოვიდე და ეკონომიკაზე რაღაცა ვთქვა. იმის გამო რომ პრეზიდენტი ვარ, ამას გააშუქებს ადგილობრივი მედია და შეიძლება საერთაშორისო მედიამაც წაიღოს. მათ შორის გამოხვიდე და თქვა მთავრობის ინიციატივებზე რომელიც სწორია და ინიციატივების უმრავლესობა, რომელიც ჩემი აზრით არასწორია თქვა რომ არასწორია. მოუწევთ რაღაცებზე დებატებში შემოსვლა. ახლა „ოცნებას“ ჩვენთან თვეებია არ უდებატია, თუ პრეზიდენტის ამპლუაში გავაკეთებ იგივეს, მოუწევთ.

პრეზიდენტის სავარძლიდანაც დაჯდებოდით ტელედებატებში?

რა თქმა უნდა. ერთ-ერთი დაპირება ეს არის, რომ თვეში ერთხელ რომელიმე მინისტრს შევხვდე და საჯაროდ Facebook Live-ში ვედებატო. გამოვკითხო, რას აკეთებს თავის სფეროში და მათ შორის ავუხსნა თუ რამე არასწორია და რატომ უნდა აკეთებდეს სხვანაირად.

შესაძლებლობების ფარგლებში მედიისთვისაც ხელმისაწვდომი იქნებით? დათანხმდებით პატარა მედიასაშუალებებს ინტერვიუზე? მაგალითად, პრეზიდენტ მარგველაშვილთან 3 სხვადასხვა მედიიდან ვცდილობდი და ვცდილობ ინტერვიუს აღებას, აგერ უკვე 5 წელი გახდება. თქვენც ასე ხომ არ იქნებით?

რაღაცა პერიოდულობით შევხვდები მედიას. ესეც მაქვს დაპირებებში. რა თქმა უნდა პატარა მედიასაშუალებებისთვისაც ღია ვიქნები. პრეზიდენტი მარგველაშვილი როგორც ჩანს ძალიან დაკავებულია. შესაძლოა ერთი ერთზე ყველას ვერ შევხვდე, მაგრამ რაღაც რაოდენობის მედიასთან რატომაც არა.

მე ვარ კანდიდატი, რომელიც საკუთარი Facebook გვერდიდან ადამიანებს ველაპარაკები. მათ შორის ხშირად „გირჩის“ გვერდიდანაც ვწერ. თუ პრეზიდენტი გავხდები, ვაპირებ რომ ეს რეჟიმიც კი შევინარჩუნო. ამით განვსხვავდები სხვა კანდიდატებისგან, რომლებიც საკუთარ გვერდებს არიან ამოფარებულები, რომლებსაც ადმინისტრატორები ან პასუხობენ ან არც პასუხობენ და იმით არიან დაკავებულები რომ კრიტიკულ კომენტარებს შლიან ხოლმე.

საპრეზიდენტო არჩევნებზე მეორე ტური იქნება?

ბევრ რამეზეა დამოკიდებული. დღევანდელი მონაცემებით, ყველა წინაპირობაა იმის რომ მეორე ტური იყოს.

თქვენ იქნებით მეორე ტურში?

კი, ვიქნები და მინდა რომ მოვიგო. მაგისთვის ვარ არჩევნებში.

ჯერ კამპანია არ დაწყებულა. ის, რომ რამდენიმე კანდიდატი რეგიოენბში დადის, საკუთარ კოორდინატებს ხვდებიან და პენსიებზე ელაპარაკებიან, ეს არ ნიშნავს რომ კამპანია დაწყებულია.

„ნაციონალურ მოძრაობას“ და „ევროპულ საქართველოს“ გულისხმობთ?

მეტი არ ვიცი, ვინ შეიძლება დადიოდეს.

თუ მოხდება ისე რომ მეორე ტური იქნება, მაგრამ თქვენ ვერ გახვედით დაუჭერთ რომელიმე ოპოზიციურ კანდიდატს ან საერთოდ რომელიმე კანდიდატს მხარს?

არა. ასეთი რაღაცა არასდროს არ გამიკეთებია და არც ახლა არ გავაკეთებ. „გირჩს“ არ ჰყავს ეგეთი მხარდამჭერები, რომლებიც უსიტყვოდ ემორჩილებიან ჩემ მითითებებს. ეგეთ რამეს არც ვაკადრებ და არც მიიღებენ. არავითარ მოწოდებას არ გავაკეთებ.

პრეზიდენტობის შემთხვევაში პარტიებთან ითანამშრომლებთ თუ ისევ იგივე ხედვები გექნებათ?

ხედვები იგივე მექნება. ჩემს ხედვებს სიკვდილამდე არაფერი შეცვლის. დიდი ხანია, რაც ამ ხედვებზე ჩამოვყალიბდი.

ხედვებთან დაკავშირებით კომპრომისზე წასვლას არ აპირებთ?

 

ხედვებზე კომპრომისზე წასვლას არ ვაპირებ, თუმცა თანამშრომლობას არ გამოვრიცხავ. თუ სასარგებლო საქმეზე თანამშრომლობის სურვილი ექნებათ, სიამოვნებით. დღეს რითიც არიან დაკავებულები, პოლიტიკური კეკლუცობა თუ პოლიტიკური თამაშები დავარქვათ, ასეთ რაღაცებში ურთიერთობას არ ვაპირებ.

 

ბოლო წლებია საქართველოსთვის ე.წ. აქილევსის ქუსლად იქცა შრომის კოდექსი და შრომის უსაფრთხოების კანონის მიღება. რა ხედვები გაქვთ ამ საკითხზე. ვიცი, რომ თავისუფალი ეკონომიკის მომხრე ხართ და ევროპული ქვეყნების რეგულაციების წინააღმდეგიც ხართ ეკონომიკის კონტექსტში. უშუალოდ ამ საკითხებზეც ეწინააღმდეგებით?

კი. ყველა რეგულაცია საბოლოო ჯამში ცუდია. იმ ადამიანებისთვის, ვისაც ამან სიკეთე უნდა მოუტანოს. შრომის კოდექსში ჩადებული რეგულაციები დამაზიანებელი თავად დასაქმებულებისთვისაა. შრომის კოდექსი, ასეთი კანონი არ უნდა არსებობდეს, დასახევი და გადასაგდებია. შრომითი ურთიერთობები ორ მხარეს შორის კერძო ხელშეკრულებებმა უნდა არეგულიროს.

მაგალითად ავიღოთ დეკრეტული შვებულება, გაწერილია 6 თვე. ქალთა უფლებების დამცველები ითხოვენ კიდევ უფრო გაზრდას, რადგან ქალი რომ ბავშვს გააჩენს მერე ამ ბავშვს სჭირდება გაზრდა. სინამდვილეში თავად ამ ქალებისთვის მოაქვს ცუდი შედეგი. რაც უფრო ხანგრძლივია დეკრეტული შვებულება სავალდებულო, ანაზღაურებადი, მით უფრო დაბალია ალბათობა რომ სამსახურში აიყვანონ დასაოჯახებელი გოგო. დამსაქმებელი ფიქრობს, მე რომ ავიყვანო გასათხოვარი გოგო, შეიძლება დაქორწინდეს, დაფეხმძიმდეს და შვილი გააჩინოს. მერე ეს რომ დეკრეტში გავა 6-8 თვე ტყუილად უნდა ვუხადო ხელფასი.

ანუ კარგი მიზნისთვის კი იბრძვიან რეგულაციებით, მაგრამ სიანმდვილეში უარეს შედეგს ქმნიან. საფრანგეთი ცნობილია იმით რომ არის შპს-ს ტიპის კომერციული ორგანიზაციები, სადაც ზუსტად 49 ადამიანი მუშაობს. იმიტომ რომ კოდექსში უწერიათ, თუ 50 ან მეტი ადამიანი გყავს სამსახურში დასაქმებული პროფკავშირი უნდა შექმნა და პროფკავშირის წარმომადგენელი უნდა გყავდეს მენეჯმენტში. მაგის დაშვება არ უნდათ. ამიტომ 49-მდე ადიან, მერე ახალ შპს-ს ხსნიან და იქ იწყებენ ხალხის აყვანას. რეგულაციები უნდა შევაფასოთ იმგვარად, რა შედეგამდეც მას გავყავართ.

მაგრამ, ჩვენ ხომ ისეთი ქვეყანა ვართ, სადაც რეგულაციების გარეშე დამქირავებელმა დაქირავებულს შესაძლოა 1 კვირიანი შვებულებაც კი არ მისცეს...

ახლა გვაქვს რეგულაციები, მაგრამ მაინც ხდება ასე. ჩვენ ვართ ღარიბი ქვეყანა, სამუშაო ადგილები არის ცოტა და მასზე მოთხოვნა დიდი, ამიტომ დამქირავებლებს აქვთ დიდი ძალაუფლება. პარლამენტი რას ჩაწერს კანონში მნიშვნელობა არ აქვს, მთავარია გარეთ, ქუჩაში რა ხდება. სანამ ადამიანები მზად არიან დავით გარეჯში შიშველი ხელით გიურზები დაიჭირონ რაღაცა ანაზღაურების სანაცვლოდ, მანამდე შრომის უსაფრთხოებაზე რამდენი რეგულაციებიც გინდა წერე, არაფერს არ უშველის. ამ ქვეყანაში ადამიანები ამისთვის მზად არიან, იმიტომ რომ შვილები ჰყავთ მშიერი. როცა გავმდიდრდებით და დაქირავებულს ალტერნატივა ექნება, მერე დამქირავებელი ვეღარ მოიქცევა ისე როგორც თქვენ თქვით.

სწორედ მანდ არის პრობლემა როგორ მივაღწიოთ იმას, რომ კონკურენტული ბაზარი შეიქმნას?

თუ რეგულაციებს დავამატებთ, ის სამუშაო ადგილებს მოკლავს.

ეკონომიკისა და შრომის მიმართულებით თუ არის თქვენთვის იდეალური მაგალითები და რომელია თქვენთვის ასეთი?

სინგაპურს არ აქვს შრომის კოდექსი და ამიტომ სინგაპურში უმუშევრობა ყოველთვის ყველაზე დაბალია. 2007 წელს, მსოფლიო ეკონომიკური კრიზისის დროსაც კი სინგაპურში უმუშევრობა 2.5%-ს არ აცდენილა. ჩვენ მივდივართ ევროკავშირისკენ და შანსი არ გვაქვს ამ მოდელზე გადავიდეთ. ევროპისკენ თუ მივდივართ, ერთ-ერთი ყველაზე ლიბერალური შრომის კანონმდებლობა დანიას აქვს.

ეკონომიკურ მოდელს რაც შეეხება, სხვადასხვა კომპონენტით სხვადასხვა ქვეყანა გამოირჩევა, მაგრამ ჩემი აზრით, ყველაზე კარგი მაგალითი ირლანდიაა. გასულ საუკუნეში ირლანდია ერთ-ერთი ყველაზე ღარიბი ქვეყანა იყო ევროკავშირში. ახლა კი ერთ-ერთი ყველაზე მდიდარია. თუ სწორად მახსოვს შარშან 10%-იანი ეკონომიკური ზრდა ჰქონდა. მდიდარ ქვეყნებზე ამბობენ ხოლმე, რომ მდიდარ ქვეყნებს უჭირს ეკონომიკური ზრდა. ირლანდია არის ქვეყანა, რომელიც მაგ მითებს ანგრევს. ერთ წელს 26 თუ 27%-იანი ზრდაც კი ჰქონდა. თუმცა, ყველაფერი არსად არ მომწონს. სრულად თავისუფალი, ისეთი მე როგორიც წარმომიდგენია არსად არაა.

ინტერვიუს ბოლოს ძალიან მოკლედ უთხარით ამომრჩეველს უთხარით, რატომ უნდა დაგიჭიროთ ამომრჩეველმა მხარი?

იმიტომ რომ „გირჩი“ არის ერთადერთი პარტია, რომელიც არ არის უკვე არსებული პოლიტიკური სისტემის ნაწილი და ჩვენ მართლა შეგვიძლია რაღაცების შეცვლა. ჩვენ ეს დავამტკიცეთ იმ საქმეებით, რაც გავაკეთეთ. შეიძლება მოგწონდეთ „გირჩი“ ან არ მოგწონდეთ, მაგრამ საქმეს ვაკეთებთ და ყველა სხვისგან ვართ გამორჩეული.

"ნაცმოძრაობამ" საერთო ოპოზიციური კანდიდატის იდეა ჩამოანგრია!"-ინტერვიუ გიორგი ახვლედიანთან

"ნაცმოძრაობამ" საერთო ოპოზიციური კანდიდატის იდეა ჩამოანგრია!"-ინტერვიუ გიორგი ახვლედიანთან

27 ივლისი, 2018

ამ თემაზე გიორგი ახვლედიანმა „აიპრესთან“ ინტერვიუში ისაუბრა. პოლიტიკოსი ამბობს, რომ მის პარტიას „ნაცმოძრაობასთან“ კონსულტაცია არც პირისპირ და არც საერთო ფორმატში არ ჰქონია, თუმცა ეს ინფორმაცია იმ პოლიტიკოსებისგან აქვს, ვინც ენმ-ის...

5 პოპულარული სიახლე
USD 2.5558
EUR 2.9154
GBP 3.2556
TRY 0.4193