"ივანიშვილმა სააკაშვილთან ალიანსი საკუთარ გუნდში მოიკითხოს!" - ინტერვიუ ნინო ბურჯანაძესთან

"ივანიშვილმა სააკაშვილთან ალიანსი საკუთარ გუნდში მოიკითხოს!" - ინტერვიუ ნინო ბურჯანაძესთან

„დემოკრატიული მოძრაობის“ ლიდერი ნინო ბურაჯანაძე აცხადებს, რომ ოპოზიციაში ერთობის შესაქმნელად მუშაობა დაწყებულია. მუშაობენ იმაზეც, რომ საპრეზიდენტო არჩევნებზე საერთო კანდიდატი შეარჩიონ. ბურჯანაძის განმარტებით, თუ მასზე ერთი პარამეტრით უკეთეს კანდიდატს, ან იმ დროისთვის მისაღებ პირს შეარჩევენ, მზად არის საპრეზიდენტო არჩევნებში მონაწილეობაზე უარი თქვას.

ნინო ბურჯანაძე „აიპრესთან“ ინტერვიუში იმასაც ამბობს, მოლაპარაკების მაგიდა ყველასთვის ღიაა, თუმცა პირადად ის „ნაციონალურ მოძრაობასთან“ და „ევროპულ საქართველოსთან“ რაიმე სახის თანამშრომლობას გამორიცხავს. ამბობს, რომ ყველა საკითხზე საბოლოო გადაწყვეტილება „ლიდერთა საბჭომ“ უნდა მიიღოს. აქვე აღნიშნავს, რომ პრაქტიკულად გამორიცხულია „ლიდერთა საბჭომ“ ამ პარტიებთან ითანამშრომლოს.

ბურჯანაძე ჩვენთან ინტერვიუში რუსულ-ქართულ ურთიერთობებზეც საუბრობს. პოლიტიკოსი გმობს არჩილ ტატუნაშვილის გარშემო განვითარებულ მოვლენებს. მიიჩნევს, რომ პროცესში ყველა მხარე უნდა ჩაერთოს. მომხდარ ფაქტში საქართველოს ხელისუფლებას ადანაშაულებს, რადგან ვერ მოახერხა ვითარების ნორმალიზება და საკუთარ მოქალაქეების დაცვა. მისივე შეფასებით, ხელისუფლებას გიგა ოთხოზორიას საქმეზე უფრო პრინციპული პოზიცია რომ დაეკავებინა, დღეს ასეთი ტრაგედიის თავიდან აცილება შესაძლებელი იყო. ვითარების ნორმალიზებაში კი ერთადერთ გამოსავალს დიალოგში ხედავს.

ამ და სხვა საკითხებზე ნინო ბურჯანაძესთან ვრცელ ინტერვიუს გთავაზობთ.

მოგესალმებით, დიდი მადლობა რომ დაგვთანხმდით ინტერვიუზე. გვერდს ვერ აუვლით იმ ტრაგედიას, რაც მოხდა, ამიტომ საუბარიც ამ თემით დავიწყოთ. ოკუპირებულ ცხინვალში, ციხეში გაურკვეველ ვითარებაში გარდაიცვალა საქართველოს მოქალაქე არჩილ ტატუნაშვილი, რომლის ცხედარსაც ოჯახს არ აძლევენ. როგორ შეაფასებთ არსებულ ვითარებას? (ინტერვიუ ჩაწერილია ოთხშაბათს 28 თებერვალს ავტ:).

ამაზე შეფასება ერთმნიშვნელოვანია, რაც ხდება აღშფოთებას იწვევს, როდესაც ჩვენი მოქალაქეები ჩვენსავე ტერიტორიაზე გადაადგილდებიან და მერე ასეთი ტრაგედია ხდება. პირველ რიგში მინდა ოჯახს მივუსამძიმრო ამ საშინელი ტრაგედიის გამო. სამწუხაროდ შეიძლება ეს არ იყოს ბოლო ფაქტი და მსგავსი რამე კიდევ განმეორდეს. როდესაც ურთიერთობები დალაგებული არ არის და როდესაც ელემენტარული თამაშის წესები დადგენილი არ არის და როდესაც დიალოგი და საუბარი არ არის, ბუნებრივია ეს ყოველთვის იწვევს შესაძლებლობას, რომ ასეთი ტრაგედია მოხდეს. ამიტომ, უპირველეს ყოვლისა ვადანაშაულებ ჩვენს ხელისუფლებას, რომელმაც ელემენტარული პრობლემების მოგვარება ვერ შეძლო და რომელიც საკუთარ მოქალაქეებს ვერ იცავს.

რაც შეეხება იმ ფაქტს, რომ ასე გაიწელა გარდაცვლილის გადმოსვენების საკითხი, ეს აბსოლუტურად მიუღებელია. აქ რუსეთიც უნდა ჩაერთოს და საერთოდ ყველა, რომ ოჯახმა ღირსეულად დაიტიროს თავისი შვილი. ეს აბსოლუტურად მიუღებელია როგორც ადამიანურად, ისე რელიგიურად. ყველანაირი თვალსაზრისით, ეს არც პოლიტიკაში ჯდება და არც არაფერში.

ფიქრობთ, რომ ოკუპირებული ცხინვალის დე-ფაქტო ხელისუფლება იღებს ამ გადაწყვეტილებას, რომ ოჯახს ცხედარს არ აძლევენ და ამაში რუსეთის ხელისუფლება არ არის ჩართული?

ვერ გეტყვით. ასე ღრმად არ ვარ ჩართული გადაწყვეტილებების მიღების მექანიზმში, მაგრამ ნამდვილად არ მგონია, რომ ყველა კონკრეტულ საკითხთან დაკავშირებით კრემლში რეკავს ცხინვალის ხელისუფლება. არის რაღაცა გადაწყვეტილებები, რომელსაც დამოუკიდებლად იღებენ და არის უფრო სტრატეგიული გადაწყვეტილებები. როგორიც არის ოსური ჯარის რუსულ ჯართან გაერთიანება, ამას რა თქმა უნდა მხოლოდ და მხოლოდ რუსეთთან ერთობლიობაში იღებენ.

ვერ გეტყვით, არ ვიცი ამ ფაქტის უკან რა დგას. შესაბამისად, დაბეჯითებით ვერ გეტყვით.

აკრიტიკებთ ხელისუფლებას. თქვენ რომ ხელისუფლებაში იყოთ, რა ნაბიჯებს გადადგამდით?

მე რომ ხელისუფლებაში ვყოფილიყავი ის საზღვარი არ იქნებოდა გავლებული, რომელიც ახლაა გავლებული საქართველოს გულში. არ იქნებოდა ყოველკვირეულად საზღვრის გადმოწევა. გარწმუნებთ, უკვე დაწყებული მექნებოდა მოლაპარაკება როგორც ოსურ, ისე აფხაზურ მხარესთან. რა თქმა უნდა რუსეთთანაც. პირდაპირი დიალოგი არის, რაც ყველაზე რთული სიტუაციების დროსაც კი აფერმკრთალებს რთული საკითხების სიმუქეს. არ ვამბობ, რომ ყველა საკითხი ერთად გადაწყდება, როგორც კი ლაპარაკს დაიწყებ, მაგრამ როცა ლაპარაკობ და მოქმედებ ეფექტურობა გაცილებით მაღალია. შეხედეთ, ჩვენი ხელისუფლება რამეს აკეთებს? მისი ქმედება არის ის, რომ დასავლეთს გალახული ბავშვივით მიმართავს, გვიშველეთო. შენ თვითონ რას აკეთებ, შენი მოქალაქეების დასაცავად? იმ მექანიზმის შექმნა მაინც არ შეიძლებოდა ასეთი ტრაგედია რომ არ ხდებოდეს?! მაგრამ, ხელისუფლება დაკავებულია წილების გადანაწილებით, სახელმწიფოს ხარჯზე ჰესებისა და სხვა მშენებლობებით და საკუთარ ჯიბეში ჩადებით, ხეების გადარგვით და არა იმით, რომ საკუთარი მოქალაქეები დაიცვას.

ოპონენტები ხელისუფლებას იმაშიც ადანაშაულებს, რომ ე.წ. ადმინისტრაციულ საზღვრებთან გაუქმდა ის პუნქტები, რომელიც იყო. ვგულისხმობ საზღვრზე სამართალდამცავებს. თქვენი პოზიცია როგორია ამ საკითხზე?

ყველა თემა და საკითხი საერთო კონტექსტში უნდა იყოს გადაწყვეტილი. კონტექსტიდან ამოგლეჯილი საკითხი პრობლემას ნამდვილად არ წყვეტს.

უნდა გაუქმებულიყო თუ არა? ცალსახა პოზიცია არ გაქვთ?

რომ გაუქმდა რა შედეგი მოყვა? რატომ და რა პირობით გაუქმდა? ეს უნდა გვითხრას ხელისუფლებამ. აქედან გამომდინარე შეგვეძლება ვთქვათ, უნდა გაუქმებულიყო თუ არა. რამე პოზიტივი მოიტანა ამ გაუქმებამ?! არანაირი პოზიტივი არ მოუტანია! ხელისუფლების ნებისმიერ ნაბიჯს მისი მხრიდან ახსნა უნდა მოყვეს.

ახლო წარსულში აფხაზეთის ადმინისტრაციულ საზღვართანაც მოხდა საქართველოს მოქალაქის გიგა ოთხოზორიას მკვლელობა. ფიქრობთ თუ არა, რომ ამ საქმეზე ხელისუფლებას უფრო პრინციპული პოზიცია რომ დაეკავებინა შესაძლებელი იყო, რომ დღეს არჩილ ტატუნაშვილის ტრაგედია აეცილებინა თავიდან?

რა თქმა უნდა. რასაც მე ხელისუფლებასთან დაკავშირებით ვსაუბრობ ზუსტად ეს კონტექსტია, რაც თქვენ ახლა ბრძანეთ. ხელისუფლება რომ იყოს ეფექტური და ქმედითი და მისი ერთადერთი მოქმედება აღშფოთებით არ გამოიხატებოდეს და საერთაშორისო თანამეგობრობისადმი მიმართვით - გვიშველეთო. რა თქმა უნდა მსგავსი ფაქტები ვერ მოხდებოდა. ან მინიმუმამდე იქნებოდა დაყვანილი. მაგრამ, როცა ხელისუფლება უმაქნისია, რა თქმა უნდა ასეთ დროს იმ ადამიანებისთვის რისკი გაცილებით მაღალია, რომლებიც კონფლიქტის ზონაში ცხოვრობენ, ან გადაადგილდებიან.

დალაპარაკებით რა შეიცვლება იმ ვითარებაში, როცა რუსეთი არ არის თანახმა მოახდინოს ტერიტორიების დე-ოკუპაცია?

ქართული მხარე ელაპარაკა?! რა იცის რომ მზად არ არის?!

განცხადებებიდან ასე ჩანს.

როდესაც არ ელაპარაკები ადამიანები ერთ განცხადებას აკეთებენ, როცა დაელაპარაკები მეორეს. თუ ძლიერი ხარ, გაქვს არგუმენტები და შეგიძლია მხარე რაღაცაში დააინტერესო... მოლაპარაკების ამოცანა ეგ არის.

კარასინიმ გააკეთა ცოტა ხნის წინ განცხადება და თქვა, რომ ნურავის ექნება დე-ოკუპაციის ილუზიაო...

მე ძალიან გამიკვირდა კარასინის განცხადების ტონი. გახსოვთ, უცნაური ფორმულირებები იყო. კარასინი ძალიან მაღალი რანგის დიპლომატია და მე ვფიქრობ, რომ მას ეს განცხადება შემთხვევით არ გაუკეთებია. ამ განცხადების უკან რაღაცა მოხდა.

რა?

ჯერჯერობით არ ვიცი.

რა ეჭვი გაქვთ?

რაღაცა გართულდა! მე ვფიქრობ, რომ იყო რაღაცა შეთანხმება, რომელიც ქართულმა მხარემ არ შეასრულა, რამაც კარასინის ასეთი მწვავე განცხადება განაპირობა. ის აკეთებს ხოლმე ხისტ განცხადებებს, მაგრამ იმ ფორმით, ცოტა შეურაცხმყოფელ-დამცინავი ფორმით განცხადების გაკეთება მისთვის დამახასიათებელი არ არის.

ოპოზიციური პოლიტიკური ძალებიც ახსენა ამ კონტექსტში...

რა მნიშვნელობა აქვს.

რაც შეეხება მოლაპარაკებას, მისი ამოცანა არის შეცვალო ის რეალობა, რომელიც არის. თუ ის რეალობა გაწყობს, რომელიც არის, მაშინ ლაპარაკსაც არ აქვს აზრი. როცა შენ არ გაწყობს, რომ შენს ტერიტორიაზე უცხო ქვეყნის ჯარია. როცა საზღვრის ყოველდღიურად გადმოწევა არ გაწყობს, როცა შენი მოქალაქე თავისივე ახლობლის, ან მისივე ოჯახის წევრის სახლში ვერ მიდის რომ შეიძლება დაიღუპოს... როცა ეს ხდება მაშინ უნდა დაიწყო მოლაპარაკება.

დავუშვათ, რომ გარკვეულ შეთანხმებას მივაღწიეთ რუსეთის ხელისუფლებასთან, ცალკე თემაა დე-ფაქტო ხელისუფლებები. ისიც თქვით, რომ არ ფიქრობთ რომ ყველა გადაწყვეტილების მიღებისას კრემლში რეკავენ. მაშინ როგორ შეიძლება ასეთი ფაქტების გამორიცხვა თუ არა შემცირება მაინც?

ჩვენ მარტო რუსეთს კი არა, აფხაზეთისა და ცხინვალის ე. წ. ხელისუფლებებსაც უნდა ველაპარაკოთ.

დე-ფაქტო ხელისუფლება ამისთვის მზად არის?

რას ნიშნავს მზად არის? უნდა შესთავაზო... მზად არის იმიტომ რომ ისინი ჟენევის მოლაპარაკებებში იღებენ მონაწილეობას.

თუმცა, იქ აქვთ თავისი მიზანი, რომ მოახდინონ ტერიტორიების აღიარება...

ყველა მხარეს ყოველთვის აქვს თავისი მიზანი. მოლაპარაკების ამოცანა ჩვენთვის არის ის, რომ ჩვენი მიზანი განვახორციელოთ. მოლაპარაკების წარმართვის ხელოვნებაა სწორედ ის, რომ შენ ისე წარმართო პოლიტიკა და პროცესი, რომ მეორე მხარე შენი წინადადებებით დააინტერესო. დღესაც, როცა მე და თქვენ ვსაუბრობთ გვაქვს ჩვენი ინტერესი. თქვენ თქვენი ინტერესი გაქვთ, მე - ჩემი. თქვენი ინტერესია, რომ კარგი ინტერვიუ ჩაწეროთ და აჩვენოთ რომ პროფესიონალი ჟურნალისტი ხართ და კარგი კითხვების დასმა შეგიძლიათ. ჩემი ამოცანაა, რომ ასევე კარგი ინტერვიუ გამოვიდეს და ვაჩვენო, რომ კარგ კითხვაზე კარგი პასუხის გაცემა შემიძლია. ყველა სიტუაციაში ასეა. ყველა მხარეს თავისი ინტერესი აქვს.

საარჩევნო საკითხებზე გავაგრძელოთ საუბარი. დაწყებულია საუბარი გაერთიანებაზე, ყოველ შემთხვევაში ამის სურვილი გაქვთ, რომ მსხვილი ოპოზიციური გაერთიანება მოხდეს. თვითმმართველობის არჩევნებზეც გქონდათ ასეთი სურვილი, თუმცა მხოლოდ ორ-ბლოკიან გაერთიანებას მიაღწიეთ. დღეს თუ გაქვთ საფუძველი თქვათ, რომ უფრო მსხვილი გაერთიანება მოხდეს?

განვლილმა პოლიტიკურმა ცხოვრებამ დაგვანახა, რომ სერიოზული გაერთიანებების არშექმნა შეცდომა იყო. ლიდერთა საბჭოს ფორმატში რამდენიმე დღის წინ გვქონდა შეხვედრა, პრაქტიკულად ყველა ლიდერი დამეთანხმა იმაში, რომ პარტიების დიდი ნაწილი ადგილობრივი თვითმმართველობის დროს იყო ილუზიებში, რომ გადალახავდნენ ბარიერს. შესაბამისად, ერთობლივ მოქმედებებზე თქვეს უარი. ახლა ყველა ხედავს, რომ ამ ილუზიებიდან გამოსვლის დროა. ყველა ხვდება, რომ ხელისუფლება გაცილებით მეტად აქვს კონცენტრირებული ბიძინა ივანიშვილს, ვიდრე ეს მიხეილ სააკაშვილს ჰქონდა. უბრალოდ, სააკაშვილი ამას ძალისმიერი მეთოდებით აკეთებდა, რაც მტკივნეული იყო. ივანიშვილი ამას უფრო ეფექტურად აკეთებს მოსყიდვებისა და ფულის მეშვეობით.

ეს ძალიან სერიოზული პრობლემაა ქვეყნისათვის. ივანიშვილის ამოცანაა, რომ ქვეყანაში პოლიტიკური კლასი გაქრეს. ვიღაცას შეიძლება გაეხარდეს და თქვას, მომბეზრდა პოლიტიკოსებიო, მაგრამ ეს იცით როგორაა? ექიმზე გაბრაზებულმა რომ თქვათ ნეტა ყველა ექიმი გაქრებოდეს-ო. ექიმმა შეიძლება გატკინოს, შეიძლება გავნოს, სამწუხაროდ ასეც ხდება ხოლმე, მაგრამ ეს არ ნიშნავს, რომ საექიმო კლასი მთლიანად უნდა გავაქროთ. ასეა პოლიტიკაშიც. პოლიტიკოსები ჩვეულებრივი ადამიანების მსგავსად უშვებენ ხოლმე შეცდომებს, ოღონდ მათი შეცდომა ძალიან ნათლად ჩანს ხოლმე. ეს ყველაფერი გამოიყენება არაჯანსაღი ძალების მიერ. ამას აკეთებდა წინა ხელისუფლებაც და ამას აკეთებს დღევანდელი ხელისუფლებაც რომ მოხდეს პოლიტიკური კლასის დისკრედიტაცია. როგორც ექიმის გარეშე ვერ განკურნავ დაავადებებს, ისე პოლიტიკისა და პოლიტიკოსის გარეშე ვერ იქნება თანამედროვე სახელმწიფო.

ბიძინა ივანიშვილს არ სჭირდება სახელმწიფო, მას სჭირდება თავისი ორღობე, სადაც მე, თქვენ და ნებისმიერი ადამიანი მის კეთილ ნებაზე ვიქნებით დამოკიდებული. ამის განხორციელებაში ავად, თუ კარგად მას პოლიტიკური კლასი უშლის ხელს. ამიტომ, ახლა პოლიტიკური კლასის ამოცანა გაერთიანება უნდა იყოს. ეს იმისთვის, რომ ქვეყანა როგორც სახელმწიფო გადარჩეს. ოპოზიციამ წარმატებას რომ არ მიაღწიოს საქართველო რუკიდან კი არ გაქრება, ღმერთმა ნუ ქნას! მაგრამ დღეს საქართველო მსოფლიოს პოლიტიკური რუკიდან პრაქტიკულად გამქრალია. ჩვენ არ ვართ არცერთი სახელმწიფოსა და საერთაშორისო ორგანიზაციის დღის წესრიგში. 105-ე საკითხად რომ განიხილავენ საქართველოს საკითხს, ეს არ არის დღის წესრიგში ყოფნა. ამიტომ, აუცილებელია, რომ პოლიტიკურმა სპექტრმა გააკეთოს სწორი დასკვნა, რომ ფარული და ჩრდილოვანი მმართველობა, ფულის მმართველობა და მბრძანებლობა ქვეყანაში პოლიტიკური მმართველობით უნდა შეიცვალოს.

საკმაოდ ხმაურიანი განცხადება გააკეთეთ, რომ საერთაშორისო დღის წესრიგიდან საქართველო გამქრალია. ამ განცხადების გამო მმართველმა გუნდმა შესაძლოა სააკაშვილთან ალიანსშიც დაგადანაშაულონ...

სულ არ მაინტერესებს რაში დამადანაშაულებს მმართველი გუნდი. სააკაშვილთან ალიანსი ბიძინა ივანიშვილმა თავისთან მოიკითხოს და თავის მმართველ გუნდთან. სააკაშვილთან კოაბიტაციაში მე არ შევსულვარ. მმართველ გუნდში მყოფი ძალიან ბევრი ადამიანისგან განსხვავებით მე ყოველთვის იმას ვამბობ, რასაც ვაკეთებ! როცა ვიყავი სააკაშვილთან მე ამას არ ვმალავდი და ჩემი რეიტინგის საზარალოდაც კი ვმოქმედებდი და გარეთ არ გამომქონდა ის ამბები, რაზეც შიგნით ვეჩხუბებოდი. ქულებს არ ვიწერდი, რა მაგარი გოგო ვარ, შიგნით ვჩხუბობ-თქო. როცა წამოვედი ბოლომდე ვებრძოდი სააკაშვილს, იმ ხალხისგან განსხვავებით, რომლებიც მაშინაც კუდს უქიცინებდა სააკაშვილს და შემდეგაც კოჰაბიტაციაში შევიდა. ჰკითხეთ ერთი მმართველ გუნდს, რატომ არ გადმოსცა სააკაშვილი უკრაინამ საქართველოს? რატომ გაუშვა პოლონეთში და არ გამოუშვა საქართველოში?

რატომ? რა ინფორმაციას ფლობთ?

იმიტომ რომ ეს იყო გარიგება. პრეზიდენტებს არ იჭერენ და არ გადასცემენ სხვა სახელმწიფოს 4 პიჯაკის ყიდვის გულისთვის. ივანიშვილს სააკაშვილისთვის ბრალი რომ აგვისტოს ომის საკითხზე, მოსახლეობის ევაკუაციის დაგვიანებისთვის, რასაც უამრავი ადამიანის მსხვერპლი მოჰყვა; 2011 წლის 26 მაისისათვის; იმისათვის, რომ  ციხეებში ისეთი სისტემა შექმნა, რომ ადამიანების წამება და მოკვლა ჩვეულებრივი მოვლენა იყო... ამ თემებზე რომ წარედგინათ ბრალდება თუ არ გადმოსცემდნენ, ვნახავდით. 4 პიჯაკისთვის პრეზიდენტებს არ აპატიმრებენ. აი ვინ არის ალიანსში სააკაშვილთან.

კახა კალაძემ პირდაპირ განაცხადა, რომ კონსტრუქციული ოპოზიცია გიგა ბოკერია და გიგი უგულავა ყოფილან. პირდაპირ დაადასტურა კახი კალაძემ რომ „ევროპული საქართველო“ ბიძინა ივანიშვილის სატელიტი პარტიაა.

ეს დადასტურება იყო?

რა თქმა უნდა. მაგას არც სჭირდებოდა დადასტურება. ეს შეუიარაღებელი თვალით ჩანს, მაგრამ კახი კალაძემ თავისი გამოუცდელობით ისეთი კომენტარი გააკეთა, რომ ბეჭედი დაუსვა ამას. ახლა ხონის და ვანის შუალედურ არჩევნებზე გამოჩნდება ეს ყველაფერი.

თქვენ სწორად დამისვით შეკითხვა, რადგან ეს კითხვა მუსირებს. საკმარისია თქვა ის, რაც სიმართლეა და რასაც ხშირად „ნაცმოძრაობაც“ ამბობს, იმ წუთში დაგაბრალებენ რატომ იმეორებ, ან რატომ ემთხვევა განცხადებები. ანუ უნდა გაჩუმდე.

ოპოზიციურ ერთობას მივუბრუნდეთ, მოლაპარაკებები დაწყებულია? მაგალითად გქონდათ თუ არა კომუნიკაცია დავით უსუფაშვილთან. მისი მოძრაობის წარმომადგენელმა ანი მიროტაძემ გვითხრა, რომ არ გქონიათ საუბარი, თუმცა მოლაპარაკებებისთვის მზადყოფნას გამოთქვამენ...

ბატონ დავით უსუფაშვილთან და სხვა ლიდერებთან რამდენიმე დღის წინ მქონდა შეხვედრა. ეს იყო ერთობლივი შეხვედრა და ჩვენ ძალიან საინტერესოდ ვისაუბრეთ. პრაქტიკულად შეგვიძლია ვთქვათ, რომ კონსულტაციები დაწყებულია. მთავარია, რომ სრულიად განსხვავებული პოლიტიკური ორიენტაციის ადამიანები ვსხედვართ ერთი მაგიდის ირგვლივ. ვცდილობთ, რაც ჩვენს პრინციპულად განგვასხვავებს ხელს არ უშლიდეს იმ გადაწყვეტილებების მიღებას, სადაც ჩვენი პოზიცია ერთიანია. ვფიქრობ, რომ კონსულტაციები პრეზიდენტის კანდიდატთან დაკავშირებით სრულიად რეალისტურია.

იმ ვითარებაში, როდესაც ოპოზიციურ ლიდერებს ერთმანეთთან მწვავე დაპირისპირება გქონდათ, შესაძლებელია მოლაპარაკებები? გაგახსენებთ, რამდენიმე განცხადებას. მაგალითად, შალვა ნათელაშვილმა კაბიანი სააკაშვილი გიწოდათ. მწვავე დაპირისპირება გქონდათ თქვენ და კახა კუკავასაც 2013-15 წლებში...

მახსოვს ყველა განცხადება. იცით რაშია საქმე? პოლიტიკური ცხოვრება იცვლება. შესაძლოა, მაშინ ბატონ შალვას მისი გადმოსახედიდან ჰქონდა საფუძველი რომ ასეთი განცხადება გაეკეთებინა. ან კახას, იმ პერიოდის მისი განწყობიდან გამომდინარე ჰქონდა საფუძველი, რომ ასეთი განცხადება გაეკეთებინა. ასევე მეც, თუმცა ერთი რამე ცხადია მე არასოდეს არ გადავსულვარ არავის მიმართ პიროვნულ შეურაცხყოფაზე. იგივე შემიძლია ვთქვა შალვაზე, კახაზე და ნებისმიერ სხვა ლიდერზე. პოლიტიკურ ზღვარს ხანდახან ისინი უახლოვდებოდნენ, მაგრამ გადაკვეთილი არ ყოფილა.

თქვენც საკმაოდ მწვავე განცხადება გაქვთ გაკეთებული მაგალითად კუკავაზე ჩემთან ერთ-ერთ ინტერვიუში. ვციტირებ: „ქართულ პოლიტიკურ ელიტაში რომ კაცებმა თავისი სიტყვის ფასი არ იციან, ეს დიდი ხანია ვიცი. ეს ჩვეულებრივ მოვლენად იქცა. კუკავამ თქვა, რომ პოლიტიკიდან წავიდა. თუ ისევ დაბრუნდა აუხსნას საზოგადოებას, ან რატომ წავიდა, ან რატომ დაბრუნდა“. ეს არ იყო არაკორექტული განცხადება?

არა, ადეკვატური იყო. მე ვფიქრობ, რომ კახა აჩქარდა, როდესაც პოლიტიკიდან წასვლის თაობაზე გააკეთა განცხადება. ეს მისი მხრიდან შეცდომა იყო, რადგან ის ნამდვილად პოლიტიკოსია. ვის მოსწონს და ვის - არა, ეს სხვა საკითხია. როდესაც დაბრუნდა, სწორი გადაწყვეტილება მიიღო, მაგრამ ისიც სწორია რაც მე ვთქვი. უნდა ახსნა რატომ წახვედი და რატომ მოხვედი.

კი, კაცებს ახასიათებთ ხოლმე, რომ სიტყვას წამოისვრიან ხოლმე. სამწუხაროდ ეს პრაქტიკულად ყველა კაცს ახასიათებს ქართულ პოლიტიკურ სპექტრში. ზოგს მეტად, ზოგს ნაკლებად. ჩემზე გაგიჭირდებათ რომ რაღაცა ვთქვი და მერე იმის საწინააღმდეგო რაღაცა ვთქვი, თუ არ შეიცვალა რეალობა, თუ არ დავასაბუთე რატომ ვამბობ ამას, რადგან მე ძალიან ფრთხილი ვარ ჩემს გამონათქვამებში.

მაგრამ თქვენ რა კითხვაც დამისვით მოდით ამაზე ანალოგი სპორტთან გავავლოთ. შეიძლება ფეხბურთელები ერთმანეთზე გაბრაზდნენ და გასახდელში იჩხუბონ კიდეც მატჩამდე, მაგრამ როდესაც ისინი ერთი გუნდით გადიან და მათი ამოცანა გამარჯვებაა, მაშინ გაბრაზებას გადაწევენ გვერდზე და შეიძლება ფეხბურთელმა ნაჩხუბარ თანაგუნდელს ბურთიც კი მიაწოდოს.

თუმცა, სპორტშიც მოქმედებს ხოლმე ეს შედეგზე...

რა თქმა უნდა. მაგრამ ამოცანა რეალურად ეს არის. გახსოვთ მატერაცისა და ზიდანის ცნობილი მოქმედება მსოფლიო ჩემპიონატის ფინალში. ადამიანურად და კაცურად ზიდანის მოქმედება ძალიან სწორი იყო. მას შეურაცხყოფა მიაყენეს და მან შეურაცხყოფა არ მოითმინა. გასამართლებელია, მაგრამ რეალურად მის გუნდს მისი ეს მოქმედება მსოფლიო ჩემპიონატის ფასად დაუჯდა. ანუ მან გუნდი დააღალატა თავისი მოქმედებით. არავინ იცის, მაშინ იტალია მოიგებდა თუ საფრანგეთი. პოლიტიკაშიც იგივეა. ან შენ გაბრაზებას პირველ ადგილზე აყენებ და ქვეყნისა და საქმის ინტერესს მეორე პლანზე. ან გადაყლაპავ ამას, რაც ადამიანურად ძალიან რთულია. მაგრამ, ამას აკეთებ იმისათვის რომ შენი ქვეყნისათვის სასიკეთო საქმე გამოვიდეს. თუ პოლიტიკოსი ასე არ მოქმედებს, ის პოლიტიკოსი არ არის. ჩვენ არ უნდა დაგვეტყოს გაბრაზება, თორემ კიდეც ვბრაზდებით და ნერვებიც გვეშლება.

თქვენი პარტიის საიტზე გავეცანი ინფორმაციას სათაურით: ნათელაშვილი ბურჯანაძის სასარგებლოდ კანდიდატურას ხსნის. „პრაიმ-ტაიმისთვის“ მიცემულ ინტერვიუზე დაყრდნობით არის გაკეთებული ეს სათაური. მართალია ინტერვიუში ამას არ ამბობთ, მაგრამ სათაური ასეთია. ყოფილა ასეთი რამე? გუგავამ კატეგორიულად გამორიცხა ჩვენთან საუბარში ეს ფაქტი...

ეს არ არის სწორი ფორმულირება, რომ ნათელაშვილი ბურჯანაძის სასარგებლოდ კანდიდატურას მოხსნის. მეც და ბატონმა შალვამაც დაახლოებით ერთნაირი განცხადება გავაკეთეთ. ნათელაშვილმა თქვა რომ ის მზადაა საპრეზიდენტო კანდიდატობისათვის, მაგრამ ასევე თქვა რომ ის მზად არის კონსულტაციებში ჩაერთოს და თუ ოპოზიცია შეთანხმდება უკეთეს კანდიდატურაზე, ან იმ პერიოდისთვის უფრო მისაღებ კანდიდატურაზე, ის მზად არის გარკვეულ კომპრომისებზე წავიდეს. მეც იგივე განცხადება გავაკეთე. თუ იქნება ოპოზიციური კანდიდატურა, თუნდაც ჩემზე ერთი პარამეტრით უკეთესი, მზად ვარ კენჭისყრაზე უარი ვთქვა. ჩემი ამოცანა არ არის პრეზიდენტის სავარძელი, ჩემი ამოცანა ქვეყნისთვის სასიკეთო საქმის კეთებაა. თუ დავინახავ, რომ ქვეყნის საქმეს სხვა უკეთესად გააკეთებს, მე არ ჩავებღაუჭები არც თანამდებობას და მით უმეტეს არჩევნებში მონაწილეობას. ამის მზაობა რომ არ იყოს, მაშინ ამ კონსულტაციებს აზრიც არ ექნებოდა.

ოპოზიციურ ერთობაზე განცხადება სააკაშვილმაც გააკეთა და პრაიმერის ჩატარება შესთავაზა ოპოზიციას. მე ვუსმინე თქვენს თანაპარტიელ გუბაზ სანიკიძეს „ტვ პირველის“ ეთერში, რომელმაც ისეთი ხაზგასმით აღარ უარყო „ნაცმოძრაობასთან“ თანამშრობა, როგორც აქამდე იყო ხოლმე. გარკვეულ თანამშრომლობაზე მათთანაც ფიქრობთ?

არანაირ თანამშრომლობაზე არ ვფიქრობთ. მით უმეტეს სააკაშვილთან რაიმე თანამშრომლობა გამორიცხულია. მაგრამ, ჩვენ „ნაცმოძრაობას“ რაიმე გადაწყვეტილების მიღებას ვერ ავუკრძალავთ. თუ გადაწყვეტს, რომ ოპოზიციურ ერთობას დაუჭიროს მხარი, არ ვლაპარაკობ ამ წუთას კანდიდატურაზე, ვსაუბრობ იდეაზე, ამ ვითარებაში ვერ გამოვალ და ვერ ვიტყვი ვკრძალავო. რომც ვთქვა, ამას ვერ განვახორციელებ. ჩვენ არანაირ თანამშრომლობას არ ვაპირებთ, სააკაშვილთან აბსოლუტურად გამოვრიცხავ.

არც „ევროპულ საქართველოსთან“?

მათთან პირველ რიგში. ბოკერია ივანიშვილთან არის გარიგებული. ჯერ ერთი ბოკერია არის პასუხისმგებელი ძალიან ბევრ სიბინძურეზე და უსამართლობაზე, რაც ხდებოდა სააკაშვილის დროს. მინიმუმ 50% ბოკერიას მხრებზეა. ძალიან ბევრი გადაწყვეტილება მისი დაჟინებით იყო მიღებული.

„პატრიოტთა ალიანსთანაც“ გქონდათ დაპირისპირება თვითმმართველობის არჩევნებზე...

მეც და საზოგადოების გარკვეულ ნაწილსაც „პატრიოტთა ალიანსთან“ კითხვის ნიშნები გვაქვს. „პატრიოტთა ალიანსის“ გადაწყვეტილებები ძალიან ბევრ რამეს გასცემს პასუხს.

კონსულტაციების კარი მათთვის ღიაა?

რა თქმა უნდა. ისინი დროდადრო თანამშრომლობენ „ლიდერთა საბჭოსთან“, თუმცა ისე აქტიურად არა, როგორც ეს სასურველი იქნებოდა.

დავაკონკრეტოთ, რომელიც ოპოზიციური პარტიისთვის არის დახურული მოლაპარაკებათა ოთახის კარი?

ეს არ არის ჩემი გადასაწყვეტი საკითხი. ჩემი პოზიცია „ნაციონალური მოძრაობის“ ორივე ფრთასთან დაკავშირებით ცნობილია, მაგრამ საბოლოო გადაწყვეტილება „ლიდერთა საბჭომ“ უნდა მიიღოს. მე განცხადება გავაკეთო „ლიდერთა საბჭოს“ სახელით, ეს სწორი არ იქნებოდა.

„ლიდერთა საბჭომ“ ნაციონალურ მოძრაობასთან თანამშრომლობა რომ გადაწყვიტოს, დაეთანხმებით?

თითქმის დარწმუნებული ვარ, რომ ასეთი გადაწყვეტილება არ იქნება გადაწყვეტილი.

თუმცა, თეორიული შანსი არსებობს...

თეორიული შანსი ყველაფრის არსებობს. მე გეუბნებით არა თეორიულ, არამედ პრაქტიკულ შანსებზე.

თუ ასეთი გადაწყვეტილება იქნება, დარჩებით თუ არა საბჭოში?

მე გამოვრიცხავ „ლიდერთა საბჭოსგან“ „ნაციონალურ მოძრაობასთან“ ერთობის დადასტურებას.

გიორგი ვაშაძემ გააკეთა დღეს განცხადება. მან ოპოზიცია სამ კატეგორიად დაყო: ივანიშვილთან გარიგებულებად, გაურკვეველ ოპოზიციად და შექმნილი ვითარების მიუხედავად მებრძოლებად. სთხოვა მათ დაასახელონ საკუთარი ადგილი. ეთანხმებით თუ არა ვაშაძის განცხადებას და რომელ კატეგორიაშია „დემოკრატიული მოძრაობა“?

ნაწილობრივ შეიძლება დავეთანხმოთ ამ განცხადებას. „დემოკრატიული მოძრაობის“ ადგილი მე მგონი სრულიად ცალსახაა, ჩვენი პირველივე დღიდან ვიბრძვით. არც ერთი წამით არ მიგვიტოვებია ეს ბრძოლა. მაშინაც კი, როცა ხალხმაც კი მიგვატოვა. 26 მაისს ბევრმა ადამიანმა იცოდა, რომ მათი უბრალოდ მისვლაც კი გადაარჩენდა რუსთაველზე მდგომ ხალხს. სამწუხაროდ ბევრმა მათგანმა არჩია თბილ სამზარეულოში ტელევიზორით ეყურებინა. ზოგიერთმა ისიც კი განაცხადა, არ ვიცოდით წუხელ რა მოხდა და იმიტომ ვმღეროდით აღლუმზეო. ეს კიდევ უფრო უარესი. იმ ღალატის მიუხედავად, რომელიც მაშინ ოპოზიციამაც ჩაიდინა და საზოგადოების იმ ნაწილმაც, რომელსაც სააკაშვილის მოშორება უნდოდა. ამ ყველაფრის მიუხედავად, ჩვენ თავგამოდებით ვიბრძოდით მაშინაც და ვაგრძელებთ ახლაც.

დანარჩენმა ოპოზიციამ, რომელსაც ბატონი ვაშაძე გულისხმობდა რომ გაურკვევლები არიან, რა თქმა უნდა თავისი საბოლოო გადაწყვეტილება უნდა მიიღონ.

ერთ-ერთ ინტერვიუში თქვით, რომ ჩემი პრეზიდენტობა ქვეყნის გადარჩენის ერთადერთი შანსია. ამას მოჰყვა დიდი გამოხმაურება და თქვენი კრიტიკა სოციალურ ქსელში. ხომ არ იყო ეს ხმამაღალი განცხადება თქვენი მხრიდან?

ძალიან გამკვირვებია ერთი რამის, მე რომ ასე არ ვფიქრობდე და პრეზიდენტობისთვის ვიბრძოდე, მაშინ ჩასაქოლი ვიქნებოდი. ელემეტარულად თავი ხომ უნდა გაანძრიონ?! შეიძლება მათ თქვან, რომ ჩვენ არ ვთვლით, რომ ბურჯანაძეა ქვეყნის გადარჩენის შანსი.

აი ნახეთ, ამ განცხადებაში სიტყვა „ერთადერთი“ ძალიან მნიშვნელოვანია...

მე ასე ვხედავ დღეს. მე რომ ასე არ ვხედავდე ამას დავუთმობდი მას ვისაც ვხედავ, რომ ის არის შანსი საქართველოსი. მე როცა დავინახე, რომ სააკაშვილთან ჩემი ბრძოლა ჩემი მხრიდან უარეს სისხლს და უბედურებას გამოიწვევდა და დავინახე, რომ ივანიშვილს შეეძლო უსისხლოდ გაეკეთებინა, მაშინ ხომ დავუთმე ივანიშვილს?! ჩვენ მაშინ ჩემი, ჩემი ოჯახის, პარტიის, თანაპარტიელები, მათ შორის ყოფილი პატიმრების გადმოვიტანეთ მეორე პლანზე და პირველ პლანზე ქვეყნის ინტერესი დავაყენეთ. ასევეა საპრეზიდენტო არჩევნებზეც. მე თუ დავინახავ, რომ ერთადერთი შანსი კი არა, სხვა უკეთესი კანდიდატურაა, მე მზად ვარ მოვხსნა კანდიდატურა.

ამ განცხადებების მიუხედავად ხომ არ არის იმის შანსი, რომ ოპოზიცია მოქმედი პრეზიდენტის გიორგი მარგველაშვილის გარშემო გაერთიანდეს?

არა მგონია. ჯერ ერთი თვითონ პრეზიდენტი არ არის ჩამოყალიბებული, რა უნდა ცხოვრებაში. უნდა პრეზიდენტობა, უნდა კენჭისყრა თუ არა. თვითმიზანი რომელიმე კანდიდატის მხარდაჭერა არ შეიძლება იყოს. მიზანი უნდა იყოს, რომ პრეზიდენტი თავისი გამბედაობით, ავტორიტეტით, სიტყვით გახდეს საპირწონე იმ მახინჯი სისტემისა, სადაც ბიძინა ივანიშვილის მილიარდები ყრია.

მარგველაშვილს დღეს ავტორიტეტი არ აქვს?

თქვენ ფიქრობთ, რომ აქვს?

პრეზიდენტმა გაიგო დღეს, რომ პრეზიდენტია?! ბოლომდე ვერ გაიგო. პრეზიდენტის რამდენიმე განცხადება მომწონებია, მაგრამ მის მიერ გადადგმული კონკრეტული ნაბიჯი მე არ მინახავს, რომელზეც შეიძლება ითქვას, რომ მან რაიმე შეცვალა თავისი კონკრეტული ნაბიჯით.

ბოლოს აშშ-ის ელჩის გზავნილებზეც უნდა გკითხოთ. როგორ შეაფასებთ მის მიერ გამოსამშვიდობებელ სიტყვაში გაჟღერებულ გზავნილებს? იგივე ერთპარტიული მმართველობის საფრთხეზე გააკეთა აქცენტი...

ეს ადრე რომ ეთქვა არ შეიძლებოდა? მაინცდამაინც წასვლის წინ უნდა ეთქვა?! როდესაც ყველა განცხადებას ბიძინა ივანიშვილის მხარდასაჭერს აკეთებდა, მაშინ რომ ეთქვა გაცილებით უკეთესი იქნებოდა.

ახლა აღარ შეუძლია გავლენის მოხდენა?

ახლაც რაღაცას ნიშნავს ასეთი განცხადება, მაგრამ რა თქმა უნდა მეტი გავლენა ექნებოდა მას ობიექტური პოზიცია რომ დაეკავებინა საპარლამენტო არჩევნებზე. IRI-ს NDI-ს დასკვნებიც კი იყო კითხვის ნიშნებით სავსე. ერთადერთი ვინც გამოვარდა და თქვა, რომ არჩევნები კარგად ჩატარდაო, იყო ამერიკის ელჩი. საინტერესოა, რა ინტერესი ჰქონდა.

უსუფაშვილი:ავლაბრის რეზიდენციის გამოყენების და პარლამენტის ამუშავების უკეთეს ვერსიას დავდებ(ინტერვიუ)

უსუფაშვილი:ავლაბრის რეზიდენციის გამოყენების და პარლამენტის ამუშავების უკეთეს ვერსიას დავდებ(ინტერვიუ)

18 სექტემბერი, 2018

პრეზიდენტობის კანდიდატი „აიპრესთან“ ინტერვიუში ამბობს, რომ ავლაბრის რეზიდენციაში სახელმწიფოებრივი დარბაზები უნდა განთავსდეს და გამოყენებული იყოს სხვადასხვა სახელმწიფოებრივი საქმეებისთვის. ამასთანავე გაკეთდეს საპრეზიდენტო დარბაზი...

USD 2.6226
EUR 3.0868
GBP 3.4416
TRY 0.4228